Mae Cymuned wedi gwahodd Syr William Proby, cadeirydd yr Ymddiriedolaeth Genedlaethol, i ymuno yn yr ymgyrch yn erbyn bwriad yr Ymddiriedolaeth i godi 223 o dai ar dir gwyrdd yn Rhostyllen ger Wrecsam (gweler Rhostyllen.com). Dwedodd Syr William dydd Sadwrn diwethaf bod yr Ymddiriedolaeth yn awyddus i brynu mwy o dir gwyrdd er mwyn ei amddiffyn rhag ddatblygwyr, ond yma yng Nghymru mae’r Ymddiriedolaeth wedi anwybyddu pobl leol yn erfyn arni i beidio ag adeiladu ar un o’r darnau olaf gofod gwyrdd yn Rhostyllen.

‘Credwn fod Syr William yn ddyn anrhydeddus sydd yn iawn i rybuddio yn erbyn peryglon gor-ddatblygu,’ medd Carrie Harper, cynrychiolydd Cymuned yn Rhostyllen, ‘a chredwn y caiff ei siomi’n arw pan glywith am yr hyn mae’r Ymddiriedolaeth yn ei wneud yn Rhostyllen. Rydym yn cynnig gwahoddiad iddo ymuno â’n hymgyrch yn erbyn enghraifft warthus o ddinistrio tir gwyrdd, a byddem yn falch iawn i’w gyfarfod er mwyn tynnu ei sylw at rywbeth sydd yn edrych fel enghraifft annerbyniol o roi elw o flaen pobl.’

Mae cynrychiolwyr yr Ymddiriedolaeth yng Nghymru wedi hawlio bod angen y datblygiad yn Rhostyllen er mwyn gwneud i fyny am ddiffyg cronfa ariannol ar gyfer stad Erddig – ond cafodd 63 o erwau eu gwerthu yn y 70au er mwyn creu cronfa o bron i filiwn o bunnoedd, a nid yw’n glir i le mae’r arian yna wedi mynd.

Dwedodd Tara Green, ysgrifenyddes Pwyllgor Trigolion Rhostyllen, ‘Mae gen yr Ymddiriedolaeth Genedlaethol cronfa o bron i £900 miliwn, ond maent yn disgwyl i’n cymuned fach ni dderbyn datblygiad mawr iawn oherwydd bod angen mwy o bres arnyn nhw. Ond wedyn maent yn hawlio bod modd iddynt brynu mwy o dir gwyrdd er mwyn ei amddiffyn rhag ddatblygwyr!’

Cred ymgyrchwyr ‘Dim ar Erddig’ fod rhaid i’r Ymddiriedolaeth ddewis rhwng wneud elw mawr yn Rhostyllen neu siarad yn gyhoeddus yn erbyn gor-ddatblygu. Os byddant yn ceisio gwneud y ddau, ni fydd neb yn eu cymryd o ddifrif.

Am fanylion pellach, cysylltwch â Cymuned ar 01758-612712.

Nodiadau i olygwyr:

Cewch weld datganiadau Syr William Proby ar: http://news.bbc.co.uk/1/hi/uk/7076256.stm

Heriodd y cylchgrawn ‘Private Eye’ diflaniad y gronfa £1 miliwn yn rhifyn 1193 (14eg i’r 27ain o Fedi, 2007)

Cred Cymuned fod Cymdeithas yr Iaith yn gywir i ofyn i Adran Materion Gwledig Llywodraeth y Cynulliad gymryd drosodd adeiladau ysgolion pentrefol er mwyn eu datblygu’n adnoddau adfywio’r pentrefi. Bydd modd wedyn i Awdurdodau Addysg Lleol rhentu’n ol y capasiti o’r adeilad sydd ei angen i gynnal ysgol gan dynnu’r pwysau ariannol i ffwrdd o’r ddadl a diogelu’r adnodd pwysicaf sydd gan gymuned bentrefol Gymraeg.

Bydd cael hyd o grwpiau a busnesau lleol i rannu defnydd o ysgolion bychain hefyd yn medru amlygu pwysigrwydd mentergarwch i blant ysgol, rhywbeth y mae prosiectau eraill y Cynulliad wedi ceisio ei wneud.

‘Rydym yn cefnogi’r awgrym polisi yma gan y Gymdeithas,’ medd Aran Jones, Prif Weithredwr Cymuned, ‘gan ei weld yn cynnig ffordd ddyfeisgar ymlaen gall helpu datrys un o broblemau mwyaf cefn gwlad.’

Bydd Cymuned hefyd yn cydweithio gyda’r Gymdeithas i gynnal protest tu allan i brif fynedfa Cyngor Gwynedd yng Nghaernarfon am 1 o’r gloch prynhawn dydd Iau (25/10/07) i alluogi rhieni a llywodraethwyr i godi eu llais am y Cynllun Trefnidiaeth Ysgolion a gaiff ei drafod y prynhawn hwnnw gan Bwyllgor Craffu Plant a Phobl Ifainc y Cyngor. Bydd y mudiadau’n galw ar y Pwyllgor i wrthod pasio’r Cynllun ac i gyfarwyddo swyddogion i fynd yn ôl i’w drafod gyda’r holl fyrddau llywodraethol yr effeithir arnynt er mwyn datblygu cynllun amgen sydd yn fwy bositif.

Am fwy o fanylion, cysylltwch â swyddfa Cymuned ar 01758-612712.

Ar ddydd Mercher (04/07/07) bydd dirprwyiaeth o Gymuned, y grŵp ymgyrchu cymunedol, yn cyfarfod â llefarydd tai y Democratiaid Rhyddfrydol, Peter Black, er mwyn trafod yr angen am farchnad dai leol gynaladwy yng Nghymru.

“Yr ydym yn falch o gael y cyfle i drafod y materion hyn gyda’r Democratiaid Rhyddfrydol. Yr ydym eisoes wedi cael cyfarfod gydag arweinwyr Plaid Cymru a’r Ceidwadwyr yn ddiweddar yn y Cynulliad, ac yn edrych ymlaen at glywed ymateb y Blaid Lafur i’n cais i drafod yr un materion gyda nhw,” medd Aran Jones, Prif Weithredwr Cymuned.

Cred Cymuned fod angen trafodaeth cynhwysfawr ar sefydlu egwyddor marchnad dai leol gynaladwy, yn hytrach na chanolbwyntio ar dai fforddiadwy mewn ffordd gallasai arwain at gymhlethdodau di-angen, ac byddai creu marchnad dai leol gynaliadwy yn atal y dadfeiliad sy’n digwydd mewn cymunedau ledled Cymru ar hyn o bryd, ac yn cynnig sylfaen cadarn ar gyfer y gwaith tyngedfennol o gryfhau economïau lleol er mwyn creu gwell dyfodol i Gymru gyfan. Mae’r grŵp yn gyfrifol am ymgyrch Cartrefi.com sy’n annog pobl i gymryd rhan weithgar yn eu cymunedau a gwneud gwahaniaeth ar lawr gwlad.

Am fwy o fanylion, cysylltwch â swyddfa Cymuned ar 01758-612712.

Bydd dirprwyiaeth o Gymuned, y grŵp ymgyrchu cymunedol, yn mynychu nifer o gyfarfodydd yn y Cynulliad dydd Mercher yma (13/06/07), gyda Ieuan Wyn Jones, Nick Bourne, Mark Isherwodd a Rhodri Glyn Thomas, er mwyn trafod y darpar Mesur Tai i Gymru y mae’r Blaid Lafur wedi ymrwymo i’w baratoi.

‘Mae hyn yn gyfle euraidd i weithredu polisiau blaengar wneith wahaniaeth real i bobl Cymru,’ meddai Aran Jones, Prif Weithredwr Cymuned. ‘Rydym yn falch iawn i fod yn trafod y camau nesaf yn hyn o beth gydag arweinwyr Plaid Cymru a’r Ceidwadwyr, ac yn edrych ymlaen at glywed ymateb y Blaid Lafur a’r Rhyddfrydwyr Democrataidd i’n cais i drafod yr un materion gyda nhw.’

Cred Cymuned fod angen trafodaeth cynhwysfawr ar sefydlu egwyddor marchnad dai leol gynaladwy, yn hytrach na chanolbwyntio ar dai fforddiadwy mewn ffordd gallasai arwain at gymhlethdodau di-angen.

‘Mae egwyddor y farchnad leol eisoes wedi’i sefydlu mewn llefydd fel Swydd Efrog ac ynysoedd y Sianel,’ meddai Iestyn ap Dafydd o Gaerffili, ‘a rydym yn fawr obeithio y bydd gwleidyddion Cymru yn darparu sustem tebyg er mwyn ennill dyfodol cynaladwy real i gymunedau ar draws Gymru.’

Cred Cymuned y byddai creu marchnad dai leol gynaliadwy yn atal y dadfeiliad sy’n digwydd mewn cymunedau ledled Cymru ar hyn o bryd, ac yn cynnig sylfaen cadarn ar gyfer y gwaith tyngedfennol o gryfhau economïau lleol er mwyn creu gwell dyfodol i Gymru gyfan. Mae’r grŵp yn gyfrifol am ymgyrch Cartrefi.com sy’n annog pobl i gymryd rhan weithgar yn eu cymunedau a gwneud gwahaniaeth ar lawr gwlad.

Am fwy o fanylion, cysylltwch â swyddfa Cymuned ar 01758-612712.

Mae Cymuned, y grŵp ymgyrchu cymunedol, wedi ysgrifennu at arweinwyr pob un o’r pedair plaid wleidyddol yn y Cynulliad yn galw arnynt i gydweithio i ddatrys argyfwng tai Cymru. Dywed Cymuned fod y pedwar maniffesto’n cydnabod yr angen i weithredu ar fyrder mewn ffordd ymarferol ynghylch y mater. Gan ei bod yn bwysicach nag erioed i bobl Cymru weld y Cynulliad yn gwneud gwahaniaeth cadarnhaol, mae’n hanfodol i’r pleidiau gydnabod yr hyn sy’n gyffredin rhyngddynt ar fater tai trwy sefydlu pwyllgor i baratoi Mesur Tai i Gymru.

‘Rydym wedi’n siomi o’r ochr orau gan ymateb cyflym a chadarnhaol Nick Bourne,’ meddai Aran Jones, Prif Weithredwr Cymuned. Mae’r Blaid Geidwadol yng Nghymru wedi dangos parodrwydd gwirioneddol i weithio mewn partneriaeth gall gyda grwpiau sy’n pryderu am y mater er mwyn gwneud gwahaniaeth ymarferol i bobl Cymru, ac rydym yn edrych ymlaen at barhau i drafod gyda nhw.’

Mae’r Ceidwadwyr yn bleidiol i greu pwyllgor ad-hoc yn y Cynulliad, neu Bwyllgor Ymgynghorol gan y Llywodraeth, i arwain y gwaith o ymgynghori ar greu marchnad dai fforddiadwy, gydag ystyriaeth i greu marchnad dai eilaidd fel rhan o’r ateb.

‘Nid ydym wedi clywed gan arweinwyr y tair plaid arall hyd yma,’ meddai Aran Jones, ‘ond rydym yn obeithiol y byddant yn ymateb yn gadarnhaol i’r cyfle hwn i roi gwleidyddiaeth sy’n seiliedig ar gydweithrediad ar waith mewn modd cadarnhaol. Mae ganddynt gyfle gwirioneddol bellach i ymestyn y tu hwnt i ffiniau’r pleidiau er mwyn creu polisïau newydd beiddgar i wella bywyd i bawb yng Nghymru.’

Cred Cymuned y byddai creu marchnad dai leol gynaliadwy yn atal y dadfeiliad sy’n digwydd mewn cymunedau ledled Cymru ar hyn o bryd, ac yn cynnig sylfaen cadarn ar gyfer y gwaith tyngedfennol o gryfhau economïau lleol er mwyn creu gwell dyfodol i Gymru gyfan. Mae’r grŵp yn gyfrifol am ymgyrch cartrefi.com sy’n annog pobl i gymryd rhan weithgar yn eu cymunedau a gwneud gwahaniaeth ar lawr gwlad.

Am fwy o fanylion, cysylltwch â swyddfa Cymuned ar 01758-612712.

Mae Cyngor Cymuned Rhostyllen wedi gwrthod caniatâd i’r grŵp ymgyrchu cymunedol Cymuned gynnal cyfarfod cyhoeddus yng Nghanolfan Gymuned Rhostyllen i drafod y pentref newydd arfaethedig sydd wedi ei gynnig gan Ymddiriedolaeth Genedlaethol Prydain. Rhoddodd Cyngor Cymuned Rhostyllen ganiatâd i Ymddiriedolaeth Genedlaethol Prydain gynnal cyfarfod yn y ganolfan gymuned, ond mae’n ceisio rhoi taw ar unrhyw safbwyntiau eraill mewn ffordd sy’n tanseilio democratiaeth leol.

Gyda’r nod o gyfarfod yn lleol, archebodd a thalodd Cymuned am ystafell yng Nghlwb Chwaraeon a Chymdeithasol Bersham ar gyfer cyfarfod cyhoeddus, gan egluro’n fanwl beth oedd diben y cyfarfod a rhoi posteri iddynt i roi cyhoeddusrwydd iddo. Yr wythnos hon, mae rheolwr Clwb Chwaraeon a Chymdeithasol Bersham, Keith Sutton, wedi datgan na all y cyfarfod gael ei gynnal gan fod dau aelod o Gyngor Cymuned Rhostyllen ar fwrdd Clwb Chwaraeon a Chymdeithasol Bersham.

‘Dyma enghraifft gwbl glir o ymgais i rwystro trafodaeth agored ddemocrataidd’ meddai Aran Jones o’r grŵp Cymuned, ‘ac os nad yw Cyngor Cymuned Rhostyllen yn barod i ganiatáu trafodaeth ddemocrataidd, ddyle nhw ddim bod yn cynrychioli pobl Rhostyllen.’

Mae Keith Sutton, Rheolwr Clwb Chwaraeon a Chymdeithasol Bersham, yn honni ei fod dan yr argraff fod yr ystafell wedi ei harchebu ar gyfer parti, ond mae gan gynrychiolydd lleol Cymuned, Carrie Harper, dderbyneb sy’n dangos yn gwbl glir ei bod wedi talu am ‘Gyfarfod’.

‘Y math yma o gelwydd ac ymdrechion budr i rwystro trafodaeth agored sy’n tanseilio ffydd pobl yn y system wleidyddol’, meddai Aran Jones. Mae hyn yn destun pryder difrifol, a dylai’r Cynghorwyr sy’n cefnogi’r safbwynt hwn ystyried eu sefyllfa.’

Dywedodd trefnydd lleol Cymuned, Carrie Harper, ei bod eisoes wedi siarad â Mr Sutton wyneb yn wyneb sawl gwaith tra’n trefnu’r cyfarfod. Roedd ein bwriad yn gwbl glir, dros y ffôn, a phan drefnwyd y cyfarfod ddydd Gwener. Mae’r ffaith eu bod yn ceisio’n rhwystro rhag defnyddio’r ystafell y tu hwnt i bob rheswm.’

Am ragor o fanylion ffoniwch swyddfa Cymuned ar 01758-612712.

Ar ddydd Sadwrn (14/04/07) ym Mhenrhyndeudraeth yn ystod Cynhadledd Flynyddol Cymuned, siaradodd Chris Myant o CRE Cymru a Richard Brunstrom o Heddlu Gogledd Cymru yn gryf iawn o blaid yr iaith Gymraeg a chymunedau yng Nghymru. Mewn rhai o’r datganiadau mwyaf trawiadol sydd wedi’u cyflwyno gan ffigyrau cyhoeddus yng Nghymru hyd yn hyn, wnaethpwyd yn glir gan y ddau bod y gwaith o ennill dyfodol i’r iaith ac i gymunedau Cymraeg angen ac yn haeddu arweiniad gwell ac ymrwymiad cryfach oddi wrth y Cynulliad.

‘Roedd hyn yn ddiwrnod hynod bwysig ar gyfer iaith a chymunedau Cymru,’ medd Aran Jones, Prif Weithredwr Cymuned. ‘Dangosodd Prif Gwnstabl Richard Brunstrom yn glir iawn ei fod yn credu’n gryf bod angen i sefydliadau sydd yn gwasanaethu siaradwyr Cymraeg wella safon eu darpariaeth trwy gyfrwng y Gymraeg, a bod angen i unigolion wneud yr ymdrech i ddysgu’r iaith, tra dwedodd Chris Myant yn blwmp ac yn blaen bod cryfhau iaith a chymunedau Cymru yn medru, ac yn haeddu, mynd llaw yn llaw gyda gwaith cydraddoldeb y CRE.’

Wrth ystyried tyndra sydd wedi bod yn y gorffennol rhwng ymgyrchwyr iaith a’r CRE, cred Cymuned bod hyn yn cynrychioli newid hynod arwyddocaol ar ran safon y trafodaeth am ymgyrchu ieithyddol a chymunedol.

‘Rydym yn ddiolchgar iawn i Richard Brunstrom a Chris Myant am eu mewnbwn hanesyddol i’n Cynhadledd,’ medd Aran Jones, ‘ac felly hefyd i Ffred Ffransis o Gymdeithas yr Iaith Gymraeg a siaradodd yn gryf iawn am y dolenni rhwng gymunedau, tai ac addysg. Mae’n dod yn hollol glir bod ymgyrchu’n gryf dros yr iaith Gymraeg, a galw am fesurau i amddiffyn ein cymunedau a’u gwneud yn gynaladwy, yn rhan teilwng a chlodwiw o’r gwaith o gryfhau cymdeithas sifil yng Nghymru.’

Roedd aelodau o Purbeck Housing Action o Dorset hefyd yn bresennol yn y gynhadledd, yn mynegu cefnogaeth i waith Cymuned ar dai ac ar yr iaith Gymraeg.

‘Roeddwn ni wrth ein boddau i groesawu cyfeillion o Loegr i’r gynhadledd,’ medd Aran Jones, ‘a rydym yn edrych ymlaen at gydweithio gyda Purbeck Housing Action i hyrwyddo’r ymgyrch Homes4Locals.com mor eang â bod modd. Mae’n hen bryd i bawb weld bod ein gwaith ni yn bositif ac yn bwysig, boed yng Nghymru, yng Nghernyw, yn Lloegr neu unrhywle arall.’

Am fwy o fanylion, cysylltwch â swyddfa Cymuned ar 01758-612712.

Mae Cymuned wedi ymosod ar benderfyniad Archwilydd y Cynulliad i wrthdroi gwrthwynebiad blaenorol Cyngor Gwynedd i ddatblygu Manor y Wern ger Porthmadog yn 26 o unedau preswyl ar gyfer y farchnad agored. Cred y mudiad nad oedd yr archwilydd yn gymwys i wneud penderfyniad ynglÅ·n ag effaith y datblygiad ar yr iaith Gymraeg, a nad oedd yn ddemocrataidd derbyniol i wrthdroi penderfyniad y Cyngor Sir heb achos teilwng.

‘Mae hyn yn benderfyniad cwbl warthus,’ medd Aran Jones, Prif Weithredwr Cymuned. ‘Hoffwn wybod beth yw cymhwysterau Clive Cochrane i ddatgan na fyddai’r datblygiad yn cael effaith niweidiol ar yr iaith Gymraeg – mae cynllunwyr gyda llawer iawn mwy o brofiad o faterion ieithyddol eisoes wedi datgan i’r gwrthwyneb.’

Ni ddylai penderfyniadau lleol cael eu gwrthdroi onibai am fod buddion y cyhoedd yn cael eu tramgwyddo, medd Cymuned. Mae’r dyddiau lle mae penderfyniadau yn cael eu canoli mewn rhyw brifddinas bell wedi mynd heibio, ac er mwyn cynyddu diddordeb pobl leol mewn gwleidyddiaeth, rhaid parchu eu penderfyniadau.

‘Mae twll gwastraff yn agosach at yr annedd na’r hyn mae’r Cynulliad ei hun yn cymhell,’ medd Aran Jones, ‘felly mae’n amlwg bod Mr Cochrane yn dewis anwybyddu rhai cymhellion mewn ffordd gwbl amhroffesiynol. Os nad oes ganddo’r gallu i asesu sefyllfa sensitif fel hyn yn gywir, ni ddylai fod yn gweithio yn y maes hwn.’

Mae Cymuned yn galw ar bobl leol sydd am ddatgan eu siomedigaeth gyda’r penderfyniad annemocrataidd hwn i fynychu Cynhadledd Flynyddol Cymuned yn Neuadd Goffa Penrhyndeudraeth ar ddydd Sadwrn 14eg o Ebrill am 10.00 o’r gloch y bore. Bydd cynnig yn y Cynhadledd i gondemnio Llywodraeth y Cynulliad am wrthdroi penderfyniad Cyngor Gwynedd heb achos teilwng. Mae modd cofrestru ar gyfer y Gynhadledd trwy ebostio cymuned@cymuned.org.

Am fwy o fanylion, cysylltwch â swyddfa Cymuned ar 01758-612712.

Mae ebost wythnosol y mudiad Cymuned erbyn hyn yn cyrraedd dros 1000 o danysgrifwyr di-Gymraeg. Mae Cymuned wedi bod yn denu cefnogaeth y Cymry di-Gymraeg i’r gwaith o ennill dyfodol i’n cymunedau Cymraeg trwy ddangos sut mae problemau tebyg iawn yn wynebu cymunedau ar draws y wlad. Mae’r carreg filltir ddiweddaraf yn dangos sut mae’r gwaith yn cychwyn dwyn ffrwyth.

‘Mae sector newydd o’r poblogaeth wedi cychwyn rhoi cefnogaeth gref iawn i’n gwaith,’ medd Aran Jones, Prif Weithredwr Cymuned. ‘Rydym yn falch iawn i weld hyn yn digwydd, er bod rhaid i ni ddal ati i gynyddu’r niferoedd sydd yn derbyn yr ebost Cymraeg hefyd.’

Cred Cymuned bod ymgyrchoedd fel Cartrefi.com, AsDrwg.com a TaiHaf.com yn rhoi cyfle euraidd i’r Cymry Cymraeg a’r Cymry di-Gymraeg gydweithio ar faterion sydd yn achosi problemau sylweddol ar draws y genedl.

‘Bydd creu marchnad dai leol gynaladwy, economi leol cynaladwy, a chynghorau sir sydd yn gweithredu’n fewnol trwy gyfrwng y Gymraeg,’ medd Aran Jones, ‘yn mynd yn bell iawn i greu dyfodol llewyrchus i’r iaith Gymraeg. Trwy ddenu cefnogaeth Cymry di-Gymraeg i’r ddau cyntaf, mae modd wedyn eu hannog i gefnogi’r trydydd hefyd.’

Am fwy o fanylion, cysylltwch â swyddfa Cymuned ar 01758-612712.

Bydd Chris Myant, Cyfarwyddwr y Comisiwn Cydraddoldeb Hil yng Nghymru, yn siarad fel rhan o Gynhadledd Flynyddol Cymuned yn Neuadd Goffa Penrhyndeudraeth ar ddydd Sadwrn 14eg o Ebrill eleni. Trafodir prosiect mwyaf y Comisiwn yng Nghymru erioed, y prosiect ‘Croeso’, a bydd Chris Myant yn sôn am y cyfrifoldeb sydd ar gymunedau i groesawu newydd-ddyfodiaid, a’r cyfrifoldeb sydd ar newydd-ddyfodiaid i integreiddio i’w cymuned newydd.

‘Rydym yn arbennig o falch i groesawu Chris Myant i’n Cynhadledd Flynyddol eleni,’ medd Aran Jones, Prif Weithredwr Cymuned. ‘Rydym wedi gweithio’n gynyddol agos gyda’r Comisiwn dros y tair mlynedd diwethaf, ac yn ddiolchgar iddynt am eu cefnogaeth wrth i ni geisio ennill trafodaeth teilwng ar bwnc teimladol iawn, sef dyfodol ein cymunedau.’

Cred Cymuned bod cyfrifoldeb ar newydd-ddyfodiaid i gymunedau Cymraeg ddysgu a defnyddio’r iaith Gymraeg fel nad ydynt yn gwneud niwed i ddyfodol yr iaith a dyfodol y cymunedau hynny.

‘Mae’r Comisiwn a Chymuned yn cytuno bod un her yn wynebu’r ddau sefydliad,’ medd Chris Myant, ‘sef i gael hyd o ffyrdd i ganolbwyntio ar y pwnc mawr: sut mae’r symudiad cynyddol o bobl i fewn ac allan o ardaloedd Cymraeg, y mwyafrif helaeth ohoni yn digwydd heb ddrwg-deimlad neu densiwn, yn medru mynd llaw yn llaw gyda datblygiad cryf yr iaith Gymraeg fel rhan hyderus a chroesawgar bywyd y cymunedau hynny, rhan bydd yn cael ei dderbyn a’i rhannu gan newydd-ddyfodiad cymaint â chan y rhai cafodd eu geni i deuleuodd Cymraeg eu hiaith.’

I gadw lle yn y Gynhadledd, lle bydd Richard Brunstrom, Prif Gwnstabl Heddlu Gogledd Cymru, hefyd yn siarad, mae angen cysylltu gyda swyddfa Cymuned ar 01758-612712 neu cymuned@cymuned.org er mwyn cael bod ar y rhestr gwestai. Bydd tâl mynediad o £5 ar y drws. Bydd y Gynhadledd yn cychwyn am 10.00 y bore ac yn gorffen am 4.30 y prynhawn yn Neuadd Goffa Penrhyndeudraeth ar ddydd Sadwrn 14eg o Ebrill.

Am fwy o fanylion, cysylltwch â swyddfa Cymuned ar 01758-612712.