Mae gwefan aelodaeth newydd erbyn hyn yn fyw – ni fyddwn yn ei ‘lawnsio’ yn swyddogol tan y flwyddyn nesaf, pan bydd gennon ni’r amser i drefnu rhywbeth difyr dros y ffin – ond yn y cyfamser, byddai’n ddiddorol clywed unrhyw ymateb iddi – www.NotLikeUs.com.

Bydd gwefan arall yn fyw cyn bo hir, i dargedu cefnogaeth tramor, yn benodol yn America. Rydym yn edrych ymlaen yn fawr at weld pa mor bell bydd modd i ni wthio’r ddwy wefan – mae gennon ni aelodau di-Gymraeg yn Lloegr ac America eisoes sydd yn talu £10 y mis i’r mudiad, a rwan byddwn yn cychwyn ar y gwaith o ddarganfod ai eithriad ydy hynny, neu os ‘na farchnad i ni ei thargedu?

Mae’r holl gwestiwn o ddefnyddio’r We yn un diddorol. Mae rhai pobl yn sôn am y Cymry traddodiadol, hyn, sydd ddim gyda chysylltiad i’r We, ac yn poeni bod ni’n eu gadael i lawr trwy ganolbwyntio cymaint ar dactegau hysbysebu arlein.

Pe bai modd effeithiol o gyrraedd y Cymry heb gysylltiad i’r We, efallai byddwn i yn bersonol yn fwy gefnogol i’r syniad yna – ond gan bod hynny’n digwydd bod yr union peth bod ni wedi methu ei gwneud (ers y dyddiau ‘diwygiadol’ yn 2001), dw i’n credu bod rhaid i ni fod yn defnyddio’r gallu newydd bod y We yn cynnig, i ni ymledu ein neges i fwy o bobl nag erioed o’r blaen, a thrwy hynny i ni ddenu lefelau newydd o aelodaeth.

O lwyddo yn hynny o beth, byddai gennon ni’r arian i fedru ychwanegu sianelu traddodiadol at ein gwaith hyrwyddo – hysbysebion mewn papurau bro ayyb. Ond mae costau cyfathrebu arlein yn creu posibiliadau cwbl newydd i ni – mae modd i ni (fel rydym ni, rwan) gylchredeg e-bost wythnosol am ddim at gymaint o bobl â sydd isio ei dderbyn, lle nid oes modd i ni fforddio anfon cylchlythyr trwy’r post at unrhyw un sydd ddim yn gwneud cyfraniad misol.

Mae pethau fel hyn yn hanfodol pan mae’n dod at ehangu cylch dylanwad y mudiad, ac mae’n ddiddorol nodi ni fydd yn hir iawn (os parith pethau fel y maent ar y funud) cyn bydd nifer derbynwyr yr e-bost wythnosol Saesneg wedi cyrraedd hanner nifer derbynwyr yr un Cymraeg. Gan bod ni’n gweld patrwm lle mae canran o’r pobl sydd yn derbyn y cylchlythyr yn ymaelodi, mae hyn yn awgrymu bod ni’n symud i’r cyfeiriad cywir ar ran denu aelodau ymysg y Cymry di-Gymraeg, ac mae’r potensial i hynny wneud gwahaniaeth yn anferth.

Dyna digon o drafodaeth niwlog braidd am heddiw! Pe hoffech newyddion y mudiad gyda llai o hel feddyliau, tanysgrifiwch i’r cylchebost at www.ynyfro.com/rhestr – mae’r blog ar gyfer gwyntyllu syniadaeth mewn ffordd llai ffurfiol, ond mae’r cylchebost yn cadw at y ffeithiau!

Wedi bod yn wythnos arall o deithio, felly maddeuwch i mi os bydd hyn yn gofnod byr braidd…

Roeddwn yn cyflwyno tystiolaeth i Banel Arbenigwyr Cyngor Ewrop dydd Mawrth, fel sydd wedi’i nodi yn y cylchebost wythnosol (heb danysgrifio? Mae o am ddim, ac ar gael at www.ynyfro.com/rhestr). Roedd yn ddiddorol cael trafod sefyllfa’r iaith gyda phobl o’r tu allan i’r wlad, ac yn dda i gael cyfarfod cynrychiolwyr y Mentrau Iaith, oedd yn swnio’n debyg o fod â diddordeb pan byddwn yn lawnsio ymgyrch newydd seiliedig ar lyfryn Gareth Popkins am Iaith Fewnol Ceredigion.

Dw i’n meddwl mod i’n medru gweld mwy neu lai’n glir trwy at ddiwedd y flwyddyn rwan – mae gen i gylchlythyr i fynd allan wythnos nesaf, ac wedyn dw i isio cwblhau paratoi’r cynnws ar gyfer tri gwefan newydd erbyn y flwyddyn newydd, ac wedyn dylai’r gwaith cynyddu aelodaeth yn dechrau rhedeg ei hun, tra mod i’n medru canolbwyntio ar gynyddu ein gwaith lobio, ein gwaith ymgyrchu, a’n presenoldeb yn y Wasg.

Dim llawer i’w wneud, felly…;-)

Cofnod gwell wythnos nesaf, llaw ar fy nghalon…!

Rydych wedi darllen isod am y daith i Wlad y Basg a’n presenoldeb mewn lawnsiad ‘Croeso’ gan y Comisiwn Cydraddoldeb Hiliol, felly ni fydd y cofnod hwn yn hir iawn – dim ond ambell syniad sydd wrthi’n tyfu allan o’r daith i Wlad y Basg…

Tyfodd ein perthynas gyda Euskal Herrian Euskaraz (mae enw’r mudiad yn golygu Gwlad y Basg Fasgeg) allan o’n presenoldeb mewn seminar wedi trefnu ganddynt yn y Fforwm Cymdeithasol Ewrop diwethaf, yn Llundain y llynedd. Roedd yn amlwg yn syth bod y ddau fudiad yn wynebu ambell her tebyg dros ben, tra bod pethe eraill am ein sefyllfaeoedd yn dra wahanol. Roedd y posiblrwydd o gydweithio yn ddiddorol o’r cychwyn.

Mynychodd y cynhadledd dros y penwythnos gan aelodau o fudiadau yng Ngwlad y Basg, Cymru a Galicia. Mae cyfarfod arall ar y gweill rhwng y Basgwyr a’r Catalanwyr, nad oedd yn medru bod yn bresennol dros y penwythnos. Rydym hefyd yn gobeithio bydd modd cynnwys grwpiau o Lydaw ac Iwerddon erbyn y cyfarfod nesaf (yn Fforwm Cymdeithas Ewrop 2006).

Un o’r syniadau mwyaf ddiddorol i mi ydy’r posiblrwydd o drefnu teithiau cyfnewid, fel bydd modd i aelodau gweithredol Cymuned brofi diwylliant ac awyrgylch tebyg ond weithiau brawychus o wahanol. Rydym yn teimlo y byddai llawer un yn cael ysbrydoliaeth go-iawn o dreulio amser gyda gweithredwyr iaith yng Ngwlad y Basg, ac yn credu bod gwerth real i gryfhau cysylltiadau rhwng pobl arferol y ddwy wlad – rydym yn gobeithio trefnu rhywbeth yn hynny o beth ar gyfer gem pel-droed Cymru yn erbyn Gwlad y Basg. Mae’n anodd rhoi mewn geiriau, ond roedd y tri ohonom ni yn hollol sicr bod hyn yn gysylltiad pwysig.

Yn y flwyddyn newydd, byddwn yn mynd ati i weld faint o’n haelodau a fyddai’n fodlon rhoi lletygarwch i weithredwyr iaith o Wlad y Basg, am gyfnodau o benwythnos i fyny at wythnos. Pe hoffech ddatgan diddordeb rwan, anfon ebost at cymuned[at]cymuned.org, i ni roi chi ar y rhestr.

Ac yn olaf ar gyfer heddiw – dw i newydd archebu fy nghardiau Dolig i gyd, oddi ar siop newydd Cymuned – www.daldydir.com, ac wedyn Siop Cymuned. Mae ambell clasur yn eu mysg – Sion Corn yn cael ei arestio am beintio arwyddion wedi plesio pawb yn arw hyd yn hyn… Mae sticeri i fynd ar amlenni ar gael hefyd – ffordd berffaith i ymledu’r neges. Ewch amdani!

Yn ystod y gynhadledd:

Cynrychiolwyr grwpiau eraill:

Na, Seimon, dydy o ddim ‘jesd fel y cymoedd, rili’…

Bydd gennon ni swyddfeydd fel hyn, rhyw ddydd…
[o'r chwith, Aran Jones, Dr Seimon Brooks, Llion Jones]

Niferoedd ‘isel’ oherwydd y stormydd eira…