Mae ebost wythnosol y mudiad Cymuned erbyn hyn yn cyrraedd dros 1000 o danysgrifwyr di-Gymraeg. Mae Cymuned wedi bod yn denu cefnogaeth y Cymry di-Gymraeg i’r gwaith o ennill dyfodol i’n cymunedau Cymraeg trwy ddangos sut mae problemau tebyg iawn yn wynebu cymunedau ar draws y wlad. Mae’r carreg filltir ddiweddaraf yn dangos sut mae’r gwaith yn cychwyn dwyn ffrwyth.

‘Mae sector newydd o’r poblogaeth wedi cychwyn rhoi cefnogaeth gref iawn i’n gwaith,’ medd Aran Jones, Prif Weithredwr Cymuned. ‘Rydym yn falch iawn i weld hyn yn digwydd, er bod rhaid i ni ddal ati i gynyddu’r niferoedd sydd yn derbyn yr ebost Cymraeg hefyd.’

Cred Cymuned bod ymgyrchoedd fel Cartrefi.com, AsDrwg.com a TaiHaf.com yn rhoi cyfle euraidd i’r Cymry Cymraeg a’r Cymry di-Gymraeg gydweithio ar faterion sydd yn achosi problemau sylweddol ar draws y genedl.

‘Bydd creu marchnad dai leol gynaladwy, economi leol cynaladwy, a chynghorau sir sydd yn gweithredu’n fewnol trwy gyfrwng y Gymraeg,’ medd Aran Jones, ‘yn mynd yn bell iawn i greu dyfodol llewyrchus i’r iaith Gymraeg. Trwy ddenu cefnogaeth Cymry di-Gymraeg i’r ddau cyntaf, mae modd wedyn eu hannog i gefnogi’r trydydd hefyd.’

Am fwy o fanylion, cysylltwch â swyddfa Cymuned ar 01758-612712.

Bydd Chris Myant, Cyfarwyddwr y Comisiwn Cydraddoldeb Hil yng Nghymru, yn siarad fel rhan o Gynhadledd Flynyddol Cymuned yn Neuadd Goffa Penrhyndeudraeth ar ddydd Sadwrn 14eg o Ebrill eleni. Trafodir prosiect mwyaf y Comisiwn yng Nghymru erioed, y prosiect ‘Croeso’, a bydd Chris Myant yn sôn am y cyfrifoldeb sydd ar gymunedau i groesawu newydd-ddyfodiaid, a’r cyfrifoldeb sydd ar newydd-ddyfodiaid i integreiddio i’w cymuned newydd.

‘Rydym yn arbennig o falch i groesawu Chris Myant i’n Cynhadledd Flynyddol eleni,’ medd Aran Jones, Prif Weithredwr Cymuned. ‘Rydym wedi gweithio’n gynyddol agos gyda’r Comisiwn dros y tair mlynedd diwethaf, ac yn ddiolchgar iddynt am eu cefnogaeth wrth i ni geisio ennill trafodaeth teilwng ar bwnc teimladol iawn, sef dyfodol ein cymunedau.’

Cred Cymuned bod cyfrifoldeb ar newydd-ddyfodiaid i gymunedau Cymraeg ddysgu a defnyddio’r iaith Gymraeg fel nad ydynt yn gwneud niwed i ddyfodol yr iaith a dyfodol y cymunedau hynny.

‘Mae’r Comisiwn a Chymuned yn cytuno bod un her yn wynebu’r ddau sefydliad,’ medd Chris Myant, ‘sef i gael hyd o ffyrdd i ganolbwyntio ar y pwnc mawr: sut mae’r symudiad cynyddol o bobl i fewn ac allan o ardaloedd Cymraeg, y mwyafrif helaeth ohoni yn digwydd heb ddrwg-deimlad neu densiwn, yn medru mynd llaw yn llaw gyda datblygiad cryf yr iaith Gymraeg fel rhan hyderus a chroesawgar bywyd y cymunedau hynny, rhan bydd yn cael ei dderbyn a’i rhannu gan newydd-ddyfodiad cymaint â chan y rhai cafodd eu geni i deuleuodd Cymraeg eu hiaith.’

I gadw lle yn y Gynhadledd, lle bydd Richard Brunstrom, Prif Gwnstabl Heddlu Gogledd Cymru, hefyd yn siarad, mae angen cysylltu gyda swyddfa Cymuned ar 01758-612712 neu cymuned@cymuned.org er mwyn cael bod ar y rhestr gwestai. Bydd tâl mynediad o £5 ar y drws. Bydd y Gynhadledd yn cychwyn am 10.00 y bore ac yn gorffen am 4.30 y prynhawn yn Neuadd Goffa Penrhyndeudraeth ar ddydd Sadwrn 14eg o Ebrill.

Am fwy o fanylion, cysylltwch â swyddfa Cymuned ar 01758-612712.

Os na fydd cynghorau sir Cymru yn dilyn arweiniad rhai yn Lloegr, gallasai’r mewnlifiad gynyddu’n arw, ydy rhybudd diweddaraf Cymuned. Lansiwyd y mudiad pwyso cymunedol gwefan sydd yn galw ar gynghorau sir Cymru i fabwysiadu polisi tebyg i rai yn Lloegr trwy ganiatau tai preswyl newydd ar gyfer angen lleol yn unig, Cartrefi.com, yng Nghaernarfon a Wrecsam dydd Sadwrn diwethaf (lluniau ar gael ar www.cartrefi.com/lluniau).

‘Dyma’r tro cyntaf i ni gynnal gwrthdystiad o’r fath mewn dau le ar unwaith,’ medd Aran Jones, Prif Weithredwr Cymuned, ‘sydd yn dangos cymaint mae ein cefnogaeth ni, yn y Gogledd-Ddwyrain yn arbennig, yn tyfu. Rydym yn edrych ymlaen rwan at glywed oddi wrth y cynghorau sir mewn ymateb i’n cais iddynt gynnal pleidlais democrataidd ar y mater.’

Yn wyneb ymatebion poenus o araf ymysg gwleidyddion Cymru, mae’r argyfwng tai yn dal i waethygu – eleni, collwyd 17% yn fwy o bobl mewn tai cymdeithasol eu cartrefi nag yn 2004/5 – ac mae’r mudiad yn credu y gallasai’r sefyllfa troi’n hunllefus dros y degawd nesaf.

‘Mae cefn gwlad Lloegr yn cael ei amddiffyn yn well trwy’r amser yn erbyn datblygwyr mawr, barus,’ medd Aran Jones, ‘ac os na fydd yr un math o bolisïau yn cael eu gweithredu yng Nghymru, daw mwy o ddatblygwyr i edrych ar Gymru fel opsiwn hawdd, a bydd y mewnlifiad yn gwaethygu’n sylweddol.’

‘Mae’r cefnogaeth i’r ymgyrch hon ar lawr gwlad wedi bod yn syfrdanol hyd yn hyn,’ medd Aran Jones, ‘ac mae’n eithriadol o bwysig bod ni’n symud ymlaen i weld y polisi hwn yn cael ei drafod gan ein cynghorau sir, gyda chyfle democrataidd i’r cynghorwyr ei gefnogi mewn pleidlais.’

Am fwy o fanylion, cysylltwch â swyddfa Cymuned ar 01758-612712.

Bydd y mudiad pwyso cymunedol Cymuned yn lawnsio gwefan sy’n galw am i dai newydd gael caniatad dim ond er mwyn ateb angen lleol, www.Cartrefi.com, o flaen swyddfeydd y Cyngor yng Nghaernarfon a Wrecsam am 1 o’r gloch y prynhawn dydd Sadwrn nesaf (24/03/07). Bydd aelodau’r mudiad yn gwisgo tai ffug er mwyn tynnu sylw at anallu pobl leol i fforddio tai go-iawn.

‘Rydym wedi llythyru pob cyngor tref a chymuned a phob cynghorydd sir yng Nghymru,’ medd Aran Jones, Prif Weithredwr Cymuned, ‘a rydym wedi derbyn datganiadau o gefnogaeth o bobman yng Nghymru – sir Benfro i sir y Fflint, Ynys Môn i Fynwy. Mae cynghorwyr sir o bob plaid wedi datgan cefnogaeth, a rydym bellach wedi ysgrifennu at bob cyngor sir yng Nghymru i ofyn iddynt gynnal pleidlais democrataidd ar y fater.’

Dyma’r tro cyntaf mae’r mudiad wedi cynnal gwrthdystiad mewn dau le ar yr un adeg, ac yn dangos y twf mewn cefnogaeth sydd wedi bod yn y Gogledd-Ddwyrain.

‘Rydym angen tai ar gyfer pobl leol,’ medd Carrie Harper, o gangen Wrecsam Cymuned, ‘a dydy hyn a hyn y cant o dai fforddiadwy dim yn ddigon o bell ffordd. Rhaid am farchnad dai leol gynaladwy fel sydd yn cael eu datblygu yn Lloegr.’

‘Mae’r cefnogaeth i’r ymgyrch hon wedi bod yn syfrdanol hyd yn hyn,’ medd Aran Jones, ‘ac mae’n eithriadol o bwysig bod ni’n symud ymlaen i weld y polisi hwn yn cael ei drafod gan ein cynghorau sir, gyda chyfle democrataidd i’r cynghorwyr ei gefnogi mewn pleidlais.’

Am fwy o fanylion, cysylltwch â swyddfa Cymuned ar 01758-612712.

Ar ôl teithio i’r Eidal i ddosbarthu cardiau busnes Sing4Wales.com penwythnos ddiwethaf, bydd cefnogwyr y wefan ganu unwaith eto ar strydoedd Caerdydd dydd Sadwrn yma, pan bydd tîm rygbi Cymru yn chwarae yn erbyn Lloegr. Byddant yn dosbarthu cardiau busnes gyda geiriau’r Anthem ar un ochr a Calon Lân ar y llall, ac yn rhoi cardiau post i ffwrdd am ddim hefyd, mewn ymdrech i ysgogi mwy o ganu yn ystod gemau Cymru.

Bydd posteri, cardiau busnes a chardiau post hefyd yn cael eu dosbarthu yn Llundain, lle bydd y cwmni dylunio The Red Dragonhood yn cymryd drosodd y dafarn ‘The Famous Three Kings’ yn North End Road, wrth ochr yr orsaf danddaear yn West Kensington.

‘Rydym bellach wedi dosbarthu posteri Sing4Wales.com ar draws y byd,’ medd Aran Jones, cydlynydd y wefan. ‘Mae pawb sydd wedi cysylltu gyda ni wrth eu boddau gyda’r wefan, a rydym yn derbyn cynnigion o gymorth bob wythnos. Rydym yn hynod falch i weld y math ymateb trawiadol o bositif i’r syniad yma.’

Martin Davies cafodd y syniad o hyrwyddo’r wefan yn Llundain. Fo ydy perchennog The Red Dragonhood a’i gwmni dosbarthu thereddragonhood.com, ac ymddangosodd ar Newsnight gyda chrys-T yn codi hwyl ar ben Saeson yn ddiweddar. Bydd The Red Dragonhood yn cefnogi ymgyrch Sing4Wales.com trwy ddarparu DVD gyda geiriau’r Anthem arni i chwarae ar sgriniau mawr y dafarn cyn y gêm.

‘Mae’r Famous Three Kings i bob pwrpas yn clubhouse i Gymry Llundain ar gyfer gemau rhyngwladol. Mae llawer o fy nghwsmeriaid Cymreig yn awyddus iawn i ganu,’ meddai Richard Harvey, y landlord, ‘ond dim yn gwneud oherwydd bod nhw’n ansicr am y geiriau. Mae’r syniad yma’n sicr o greu awyrgylch arbennig iawn.’

‘Mae Sing4Wales.com a thereddragonhood.com ill dwy’n codi ymwybyddiaeth o Gymreictod,’ medd Martin Davies, ‘ac mae’r ymateb brwd iawn sydd wedi bod i’r ddwy yn dangos cymaint o falchder sydd gan y Cymry yn eu cenedl. Cwbl sydd ar ôl rwan ydy i bawb ganu’n ddigon uchel i sbarduno Cymru i fuddugoliaeth yn erbyn yr hen elyn dydd Sadwrn!’

Am fwy o fanylion, cysylltwch â swyddfa Cymuned ar 01758-612712, neu swyddfa The Red Dragonhood ar 020-8202-0697.

Yn dilyn ceisiadau am bosteri Sing4Wales.com o bedwar ban byd, mae rhai wedi’u hanfon i’r Eidal, America, Canada, Awstralia, Seland Newydd, De Affrig, Taiwan a Malta, heb sôn am Loegr, Iwerddon a’r Alban. Bydd cefnogwyr Sing4Wales.com hefyd yn dosbarthu cardiau busnes gyda geiriau’r Anthem Genedlaethol a Calon Lân ar strydoedd Rhufain o ddydd Gwener ymlaen.

‘Mae’r ymateb wedi bod yn anhygoel,’ medd Aran Jones, cydlynydd y wefan. ‘Mae pobl wedi cysylltu o bob rhan o’r byd yn diolch o waelod calon i ni am y wefan, yn dweud bod hi wedi bod yn drysor iddynt, ac yn gofyn i ni ehangu’n bellach byth yr ystod o ganeuon sydd arni.’

Mae cannoedd o bosteri a miloedd o gardiau busnes gyda’r geiriau arnyn nhw wedi’i gynhyrchu, ac mae trafodaeth yn mynd yn ei flaen gyda nifer o glybiau chwaraeon i gyd-hyrwyddo’r wefan.

‘Rydym yn siarad gyda chlybiau chwaraeon sydd yn awyddus i roi’r cardiau i’w cefnogwyr,’ medd Aran Jones, ‘ac os bydd unrhyw glybiau eraill eisiau gwneud yr un peth, byddwn ni’n falch iawn i siarad gyda nhw – cwbl sydd angen ydy iddyn nhw gysylltu trwy’r wefan ei hun.’

Am fwy o fanylion, cysylltwch â swyddfa Cymuned ar 01758-612712.

Mewn cyfarfod wythnos ddiwethaf o Gyngor Tref Pwllheli, pleidleiswyd bron yn unfrydol (gydag un aelod yn ymatal) o blaid y cynnigion polisi ar Cartrefi.com i gyfyngu caniatad codi tai preswyl newydd i achosion lle mae angen lleol. Mae Cymuned bellach wedi derbyn llythyrau cefnogol oddi wrth 20 o 61 cyngor tref a chymuned Gwynedd, sydd yn dangos cefnogaeth eang i’r polisi hwn sydd eisoes yn weithredol mewn nifer o lefydd yn Lloegr.

‘Roedd hyn yn benderfyniad pwysig iawn gan Gyngor Tref Pwllheli,’ medd Aran Jones, Prif Weithredwr Cymuned, ‘ac mae’n dangos yn glir pa mor awyddus ydy ein cynrychiolwyr etholedig ar y lefel agosaf i’r gymuned i ddatrys yr argyfwng tai.’

Mae Cymuned yn gobeithio cyfarfod swyddogion ac aelodau Cyngor Gwynedd i drafod yr ymateb sydd wedi bod oddi wrth y cynghorau tref a chymuned.

‘Rydym yn awyddus i ddangos mor eang ydy’r cefnogaeth i’r math yma o bolisi,’ medd Aran Jones. ‘Mae Cyngor Gwynedd wedi bod yn flaengar iawn ar ran cynlluniau tai fforddiadwy, a rwan mae cefnogaeth eang ar gael iddyn nhw gymryd cam bwysig ymlaen i sichrau marchnad dai leol a chynaladwy.’

Am fwy o fanylion, cysylltwch â swyddfa Cymuned ar 01758-612712.